Ko Putauaki te Maunga
Ko Orini te Awa
Ko Te Pahitaua o Irapeke te Papawhenua
Ko Ngati Awa te Iwi
Ko Mataatua te Waka
Ko Te Tohu o Te Ora o Ngati Awa te whanau whanui

Tenei te mihi maioha e karanga atu nei kia koutou nga kaimahi whanui katahi ano koutou ka uru tomo mai ki roto i te poho o tenei kaupapa ara te rorohiko tokorangi.

He kupu whakapuaki tenei mai i nga kaihautu, nga pouturuki me nga pouwhakahaere kia koutou nga kaimahi whanui e whai atu nei tenei huarahi o te matauranga ara, te rorohiko tokorangi.  Kua huri mai koutou ki tenei kaupapa kia mohio ai koutou ki nga korero e pa ana ki nga ture whanui me nga ture whaiti mai o roto i tenei roopu, nga kaupapa whanui o te wa e pa ana ki nga mahi o nga kaihautu me nga kaimahi, nga purongo korero, me nga take o te wa.  Ma te mohio ki enei korero ka taea ai e koutou katoa ki te pupuri ki te mauri o tenei whanau hei oranga mo te iwi whanui tonu.  Ma tenei kaupapa e taea ai e koutou te hikoi whakamua ki te kawe atu i nga moemoea o te iwi.  E kii ana te korero whakatupuria te kakano kia puawai maana e whakapuawaitia.

Ma te titiro, ma te whai mai i nga tohutohu o tenei kaupapa ara te rorohiko tokorangi, e taea ai e koutou ki te mohio tika ki nga mahi whanui o Te Tohu o Te Ora o Ngati Awa.  Ahakoa he aha te ture, he aha nga tikanga ranei me nga tikanga whakahaere, kei roto i tenei wahi, ma te rorohiko tokorangi me ona kaupapa hei awhina i a koutou ki te arahi atu koutou i waenganui i tenei whanau me ona kaupapa whanui.  Kia kawe tika atu e koutou nga mahi kei roto i o koutou ringaringa i waenganui i te whanau whanui o Te Tohu o Te Ora o Ngati Awa me te iwi nui tonu o Ngati Awa tae atu ki te waka o Mataatua.

No reira, nau mai, haere mai, piki mai ra, kake mai ra, toro mai te ringa matauranga nona te ao katoa. 

E kii ana te korero, ma te korero, ka mohio.  Ma te mohio, ka marama.  Ma te marama, ka matau.  Ma te matau ka tika te haere i runga i te huarahi o te maramatanga o te rorohiko tokorangi.